Блок беларускіх палітычных зьняволеных «Беларусы дзеяньня» падаў у выбарчую камісію сьпіс кандыдатаў для ўдзелу ў выбарах у Каардынацыйную раду.
У аснове сьпісу — людзі, якія прайшлі праз рэпрэсіі, турмы, валянтэрскую працу, вайну ва Ўкраіне і іншыя формы рызыкі і адказнасьці. Гэта прадстаўнікі той часткі беларускага грамадзтва, якая ўжо заплаціла кошт за сваю пазыцыю і таму глядзіць на палітыку не як на сымбалічную дзейнасьць, а як на інструмэнт дасягненьня выніку.
Блок «Беларусы дзеяньня» зыходзіць з таго, што сучасная Беларусь жыве ў рэжыме сыстэмнага закладніцтва — праз палітвязьняў, ціск на сем’і, шантаж бізнэсу і грамадзтва ў цэлым. У гэтых умовах палітыка мае сэнс толькі тады, калі яна здольная ўплываць на мэханізмы ўлады, а не толькі іх камэнтаваць. Менавіта таму «Беларусы дзеяньня» разглядаюць зьнішчэньне гэтага мэханізму як цэнтральную задачу: без гэтага любыя размовы пра рэформы і зьмены застаюцца пустымі.
Удзел у выбарах у Каардынацыйную раду «Беларусы дзеяньня» разглядаюць як спробу зрабіць гэты орган рэальным месцам прыняцьця палітычных рашэньняў — з выразнай адказнасьцю, празрыстасьцю і стратэгічнай дыскусіяй, а не толькі пляцоўкай для заяваў.
Асобная ўвага ў блоку надаецца салідарнасьці паміж рознымі групамі беларускага грамадзтва. У тым ліку — беларускаму бізнэсу, які ўнутры краіны часта становіцца аб’ектам ціску і шантажу і фактычна таксама аказваецца закладнікам сыстэмы. Блок разглядае гэтых людзей як частку грамадзтва, якая заслугоўвае прадстаўніцтва і падтрымкі, а не падазрэньняў.
Палітычная пазыцыя «Беларусаў дзеяньня» заснаваная на разуменьні, што будучыня Беларусі вызначаецца ня толькі ўнутранымі працэсамі, але і вайной Расеі супраць Украіны. Падтрымка Ўкраіны разглядаецца як ключавая зьнешнепалітычная задача і неабходная ўмова вяртаньня Беларусі дзяржаўнай суб’ектнасьці, а рэгіёну — устойлівай бясьпекі.
Блок «Беларусы дзеяньня» не абяцае хуткіх і простых рашэньняў. Але ён прапануе іншы падыход: менш сымбаляў — больш адказнасьці за вынік; менш канкурэнцыі за прадстаўніцтва — больш працы над рэальным уплывам.
Падача сьпісу — гэта не фінал, а пачатак працэсу, у якім пытаньне стаіць проста: ці здольная беларуская палітыка вярнуць сабе сувязь з рэальнасьцю і пачаць яе мяняць.
У першую тройку сьпісу блока «Беларусы дзеяньня» ўвайшлі дзеячы Асацыяцыі палітвязьняў Беларусі — Юрась Зянковіч, Іна Шырокая і Анатоль Хіневіч.
Telegram