Зноў беларускі палітыкум падзяліўся ў пытаньні адмены заходніх санкцыяў супраць дзеючай улады і стаўленьня да гэтага.
Мая пазыцыя застаецца нязьменнай зь вясны 2014 году, калі пачалася акупацыя Крыма і расейская агрэсія на ўсходзе Ўкраіны.
У нас, беларусаў, захоўваюцца ўсе шансы стаць наступнай ахвярай фашысцка-пуцінскай Расеі. Тым больш, што беларуская зьнешяя палітыка дэманструе абсалютнае непрыйманьне ідэяў “русского міра”. Таму нам трэба захоўваць і ўмацоўваць суверэнітэт і эканамічную моц нашай дзяржавы.
“Рацыя стану, як называлі нашыя продкі інтарэсы дзяржавы, перш за ўсё”, – пісаў я яшчэ ў пачатку 2014 году. Нашай рацыяй стану зьяўляецца захаваньне стабільнасьці ўнутры краіны. Таму што крамлёўскія фашысты будуць спрабаваць расхістаць сітуацыю ў Беларусі — ім абавязкова трэба замяніць Лукашэнку на сваю марыянетку ў фатэлі кіраўніка Беларусі. Бо гэта палепшыць геапалітычную сітуацыю Расеі і пагоршыць сітуацыю Ўкраіны і НАТА. Ненашмат, але дастаткова, каб у крамлёўскіх фашыстаў была спакуса тое зрабіць — гэта можа даць ім яшчэ пару год існаваньня.
Вось з гэтага трэба і сыходзіць. На сёньня ўлада дзеючага кіраўніка дзяржаўнай адміністрацыі — меньшае зло ў параўнаньні з тым, што можа здарыцца ў выпадку спробы фарсіраваць палітычныя зьмены ў Беларусі.
Утварылася тактычнае супадзеньне інтарэсаў Беларускай дзяржавы і грамадзяніна Лукашэнка. Лукашэнка імкнецца захаваць сваю асабістую ўладу, і парадаксальна ягоная ўлада сёньня ўмацоўвае дзяржаўнасьць Беларусі. 20 год яна яе разбурала, а апошнія 2 гады ўмацоўвае.
Таму я асабіста за адмену санкцыяў. Гэта не адмена санкцыяў супраць рэжыму, але адмена санкцыяў супраць краіны. Адмена санкцыяў дазволіць нам яшэч больш умацаваць нашую палітычную пазыцыю ў сьвеце, мінімізаваць эканамічную залежнасьць ад Расеі, і адцянуць нашую краіну як мага далей ад іржавага карыта “русского міра”, якое вось-вось пойдзе на дно. Я не хачу, каб нас зацмактала ў варонку, якая ўтворыцца на месцы Расеі ўжо ў самым бліжэйшым часе.
Рашэньне Эўразьвяза мудрае і ўзважанае — санкцыі застаюцца супраць крымінальных злачынцаў, але іх адмяняюць супраць эканомікі і палітычных функцыянераў дзяржавы, якія не заплямілі сябе крывёю.
І давайце памятаць, што выйграваць ад гэтага павінная менавіта Беларусь, а не лукашэнкі, ярмошыны ці іншыя самазваныя чыноўнікі. Мы іх прызнаем толькі дэ-факта і толькі часова. Прыдзе час — і беларуская фэміда павінная іх паклікаць да адказнасьці за тое, што яны рабілі з усімі намі на працягу 20 год.
