Мы атрымалі пацьверджаную інфармацыю пра правядзеньне ператрусаў, запалохваньне і іншыя формы ціску ў дачыненьні да сваякоў удзельнікаў выбарчага сьпісу Блоку беларускіх палітычных зьняволеных «Беларусы дзеяньня».

У шэрагу выпадкаў гаворка ідзе пра:

• ператрусы ў жылых памяшканьнях;
• апячатваньне кватэраў;
• пагрозы ў дачыненьні да дзяцей і блізкіх;
• крымінальныя справы, якія выкарыстоўваюцца як інструмэнт ціску.

Гэтыя дзеяньні не маюць нічога агульнага з правам або «забесьпячэньнем бясьпекі». Мы разглядаем іх як працяг сыстэмнай практыкі, якую варта называць сваімі імёнамі.

Гэта — чырвона-зялёны тэрарызм.

Рэжым мэтанакіравана выкарыстоўвае сваякоў як закладнікаў, страх і запужваньне дзеля тэрору грамадзтва, крымінальны перасьлед як форму палітычнага ціску.

Гэта пацьвярджае наш базавы аналіз: у сучаснай Беларусі дзейнічае сыстэма закладніцтва, у якой палітвязьні, іх сем’і, а таксама бізнэс і беларускае грамадзтва ў цэлым зьяўляюцца аб’ектам шантажу і тэрарызаваньня. Гэта не асобныя «перагібы на месцах», а мэханізм утрыманьня ўлады рэжымам Лукашэнкі, які будучы ня здольны дабіцца падтрымкі насельніцтва, выкарыстоўвае тэрарыстычныя метады дзеля дасягненьня нізкіх мэтаў: набіваньня кішэняў і ўтрыманьня дзяржаўнай улады незаконным чынам.

Асабліва паказальна, што хваля ціску супала з выбарчай кампаніяй у Каардынацыйную раду. Гэта сьведчыць, што нават абмежаваная палітычная актыўнасьць успрымаецца рэжымам як пагроза свайму існаваньню.

Такія дзеяньні маюць і адваротны эфэкт. Яны дэманструюць уразьлівасьць самога рэжыму, яго страх перад арганізаванай і адказнай палітычнай дзейнасьцю і няздольнасьць канкураваць у адкрытым палітычным полі.

Мы хочам асобна падкрэсьліць: беларусы, у тым ліку прадстаўнікі бізнэсу, актывісты і сем’і ўдзельнікаў палітычнага працэсу, дзейнічаюць у ўмовах пастаяннага ціску і рызыкі. Многія зь іх ужо сталі ахвярамі тэрору, рэпрэсіяў і гвалту. Гэтыя людзі, якія заслугоўваюць не асуджэньня, а салідарнасьці і палітычнай абароны.

Мы заклікаем беларускую і міжнародную супольнасьць — зафіксаваць і агучыць гэтыя факты; праваабарончыя арганізацыі — даць ім адпаведную прававую ацэнку; палітычныя структуры — даць ацэнку выкарыстаньню закладніцтва як інструмэнту ўлады; кампетэнтныя праваахоўныя і судовыя ворганы як беларускай, так і міжнароднай юстыцыі — забясьпечыць непазьбежнае пакараньне асобаў, якія спрычыніліся да тэрору ў адносінах да беларускага грамадзтва.

Наша пазыцыя застаецца нязьменнай: пакуль існуе сыстэма закладніцтва, немагчымая ні дэмакратыя, ні бясьпека, ні ўстойлівая будучыня Беларусі.

Менавіта таму наша палітычная мэта — яе дэмантаж і пакараньне тых, хто парушае законнасьць, правы і свабоды грамадзянаў Беларусі.